گوگل ہینگ آوٹ کی دوسری ملاقات

گوگل ہینگ آوٹ کی دوسری ملاقات مجھے تو بہت زبردست لگی۔ سب ہی بہت پر جوش تھے۔  یہاں ملاقات کی روداد کے بجائے کچھ دوستوں کا تعارف نئے  اور ہلکے پھلکے انداز میں اس امید کے ساتھ کے  یہ دوست ہرگز بھی برا نہیں مانیں گے۔

یہ ہیں صفدر بھائی۔ ان کی ہنسی بہت پیاری ہے۔ بلاگرز گروپ کو ٹھیک ٹھاک ٹائم دیتے ہیں مگر  کوئی یہ نہ سمجھے کہ فارغ ہیں۔  یہ وکالت کا ’’پیشہ‘‘ بھی کرتے ہیں ۔

یہ ہیں عثمان لطیف۔ بڑی بڑی آنکھوں والے۔ بولتے بھی خوب ہیں۔ ان سے اگر پوچھیں کہ پاکستان کس نے بنایا تو کہیں گے گوگل نے۔ یار دوستوں نے جب بھی موضوع بدلا یہ آخر میں تمام مسائل کا حل گوگل کو قرار دیتے تھے۔

میں پچھلے 26 سال سے جاپان میں ہوں۔ جی جناب بالکل ٹھیک سمجھے یہ ہیں یاسر جاپانی۔ گوگل ہینگ آوٹ میں شرکت کے لیے پلاؤ کھا کر آئے تھے۔ گوشت کس کا تھا ؟؟؟۔۔۔ یہ بتانے سے انکاری ہوگئے۔ خمار سے مجبور ہوکر جلد ہی سونے چلے گئے۔

الف نظامی صاحب۔ کافی سنجیدگی سے گفتگو کرتے ہیں۔ اختیاری سنجیدگی ہے یا اضطراری کچھ کہہ نہیں سکتے۔ شروع سے ہمارے ساتھ رہے۔ موضوع چاہے کوئی بھی رہا ہو یہ ہر بار  اچانک پوچھتے کہ آخر سماج کو کیسے بہتر بنائیں غالباً باقی سوالات والے کاغذ کہیں رہ گئے تھے۔ عمر بتانے میں کنجوسی کر جاتے ہیں۔

ہر دل عزیز بلال بھائی۔بہت سادہ مزاج ہیں۔ اپنی جوانی (ابھی بھی جوان ہیں)کے قصے سناتے ہیں تو ہمیں اپنا بچپن یاد آجاتا ہے۔یہ بڑے کارناموں کے چکر میں چھوٹے کاموں کو نہیں چھوڑتے۔ ان کی اسی محنت نے انکو ہر دل عزیز بنایا ہے۔

ان سے ملیے یہ خاور بھائی ہیں۔ مجھے ذرا جھگڑالو مزاج کے لگتے تھے۔ کل ملاقات ہوئی تو بہت اچھے لگے۔  گفتگو  میں مہارت رکھتے ہیں۔ سامنے والے کی بات  بھی تحمل سے سنتے ہیں۔  بولڈ ہیں سیاست دانوں کی طرح  اپنے  ’’اثاثہ جات‘‘ ظاہر کرنے سے نہیں ہچکچاتے۔  یقین نہ  آئے تو یہاں کلک کر کے دیکھ لیں۔

بہت سمجھ دار۔ جی ہاں نجیب پردیسی صاحب۔ عمدہ شخصیت کے مالک۔ بات کی تہہ تک پہنچنے کی صلاحیت کے حامل۔ کل صوفے پر اس طرح لیٹے  ہمیں دیکھ رہے تھے جیسے  بلاگرز کا ۔۔۔۔۔۔۔۔ ہو رہا ہو۔  زیادہ وقت خاموشی سے سنتے رہے۔ انہوں نے سوال اٹھایا کہ الیکشن قریب ہیں اس صورتحال میں بلاگرز  کو کیا کردار ادا کرنا چاہیے۔

اور یہ ہیں جعفر بھائی۔ بلاشبہ جتنا اچھا انکا طرز تحریر ہے اتنی ہی اچھی انکی آواز ہے۔  جب تک اردو میں بات کرتے ہیں تو ایسا لگتا ہے  جیسے مندر میں گھنٹیاں بج رہی ہوں یا کوئل کوک رہی ہو۔

جعفر اور ڈفر کے یہاں کثرت سے ایک اصطلاح ملتی ہے ’’رنڈی رونا‘‘۔   عجیب بات ہے۔۔۔ کام بھی لو پیسے بھی نہ دو ۔۔۔اوپر سے بلاگ پر واویلا مچا دو کہ روتی ہے۔ آخر کیا کرے وہ۔ یقین کریں ایک بار دونوں خود کو اسکی جگہ رکھ کر سوچیں تو۔۔۔۔۔۔انکا اپنا رونا بھی نکل آئے گا۔

نوٹ:اس تحریر سے کسی کی دل آزاری مقصود نہیں۔